Ұлыбританияның жоғары білім беру жүйесіндегі инклюзивтілік: жетістіктері мен сыни көзқарастар

2026 жылдың 12 наурызында Л. Н. Гумилев атындағы Еуразия ұлттық университетінің бас ғимаратында Ұлыбританияның жоғары білім беру жүйесіндегі инклюзивтілік мәселелеріне арналған «Inclusion in UK Higher Education: From the Perspectives of Students and Faculty» тақырыбындағы кездесу өтті.

Іс-шара AZM Education білім беру ұйымының қатысуымен ұйымдастырылды.

Кездесуге академиялық мәселелер жөніндегі департамент директоры Б.Б. Қашхынбай, Білім жоғары мектебінің директоры Б.Ж. Сомжүрек, профессор-оқытушылар құрамы, сондай-ақ Білім жоғары мектебінің білім алушылары қатысты.

Кездесудің спикерлері ретінде AZM Education ұйымының директорлары — Alastair Milne және Zeynep Kacmaz Milne сөз сөйледі.

Кездесу барысында инклюзивті білім беру ортасын дамытудың заманауи тәсілдері, жоғары білімге тең қолжетімділікті қамтамасыз ету, сондай-ақ әртүрлі білім беру қажеттіліктері бар білім алушыларды қолдауда оқытушылар мен университет құрылымдарының рөлі қарастырылды. Спикерлер халықаралық тәжірибемен бөлісіп, Ұлыбритания университеттеріндегі табысты тәжірибелерді, сондай-ақ инклюзивті білім беру саласындағы өзекті сын-қатерлерді талқылады.

Осындай кездесулерді өткізу халықаралық тәжірибе алмасуға, академиялық ынтымақтастықты дамытуға және университеттік ортаға инклюзивті білім берудің үздік тәжірибелерін енгізуге ықпал етеді.